İyul ayının
12-də Xankəndi və Kərkicahan sakinlərinin müvəqqəti məskunlaşdıqları Gəncə
şəhəri ərazisində şəhidlərimizin xatirəsinə hazırlanmış xatirə lövhəsinin
açılış mərasimi oldu. I Qarabağ müharibəsinin ilk şəhidlərindən olan Səfərov
Orduxan Aydın oğlunun dəfn edildiyi günün otuzüçüncü ildönümündə keçirilən
tədbirdə Xocalı rayon İcra Hakimiyyəti Aparatının məsul işçiləri, rayon
ziyalıları, rayon icra hakimiyyəti yanında ictimai şuranın üzvləri, QHT
nümayəndələri, şəhid ailələri, qazilər, Vətən müharibəsi iştirakçıları,
sakinlər və məktəblilər iştirak etdilər.Tədbir
iştirakçıları əvvəlcə şəhidlərimizin xatirəsinə ucaldılmış abidəni ziyarət
edərək önünə dərin ehtiram əlaməti olaraq gül dəstələri düzdülər.Sonra Dövlət
Himnimiz səsləndirildi. Torpaqlarımızın ərazi bütövlüyü uğrunda canlarını fəda
etmiş şəhidlərimizin ruhu bir dəqiqəlik sükutla yad edildi, şəhidlərimizin
ruhuna fatihə surəsi oxundu.Tədbirdə Xocalı
rayon İcra Hakimiyyəti başçısının müavini Lamiyə Qarayeva, Xocalı rayon İHB-nın
Kərkicahan qəsəbə İƏD-si üzrə nümayəndəsi Dərgah Haqverdiyev, “Xankəndi”
Məcburi Köçkünlərə Dəstək İctimai Birliyinin sədri Xatirə Vəliyeva, Qarabağ
müharibəsi veteranları, şəhid ailələri və ictimai fəallar çıxış edərək Xankəndi
və Kərkicahan camaatının torpağa bağlılığından, döyüş və mübarizə əzmindən,
şəhid Orduxan Səfərovun döyüş yolundan, şüacətindən, həmçinin Vətən
müharibəsində əldə etdiyimiz Şanlı qələbədən danışdılar.Kərkicahanın
müdafiəsi uğrunda ilk döyüşlərə atılan və ilk şəhidlik zirvəsinə ucalan Orduxan
Səfərovun döyüş yoldaşı, I Qarabağ müharibəsi veteranı Nazim Hüseynov
şəhidimizin döyüş yolundan danışaraq xatirələrini dilə gətirdi. O, Ulu öndər
Heydər Əliyevin “Vaxt gələcək Azərbaycan dünyaya günəş kimi parlayacaq”
kəlamından ilhamlanaraq, vaxt gələcək Kərkicahan öz gözəlliyi, zəhmətkeş və
vətənpərvər insanları ilə dünyaya günəş kimi parlayacaq fikrini ifadə etdi.
Orduxanla məktəbin, bağçanın tikintisində, həm də Xocalıda şəhərsalma
prosesində birlikdə çalışdığını bildirən döyüş yoldaşı, onun dəfələrlə
ermənilərə qarşı mübarizə apardığını, əziyyətinin çox olduğunu dedi. Nazim
Hüseynov hər şeyin yaxşı olacağına inanaraq elimizə-obamıza qayıdacağımıza olan
əminliyini bildirdi.Çıxışlarda bildirildi ki, nankor
qonuşularımız ermənilərin istəyi ilə SSR-i dövründən Xankəndi şəhərində
yerləşən 366-cı motoatıcı alayın zirehli texnikası Kərkicahana tuşlanmışdı.
Düşmən hər cür təzyiqdən istifadə edərək kərkicahanlıları öz doğma yurd-yuvasından
didərgin salmağa çalışırdı. Qaz kəmərləri partladılır, evlər atılan mərmirlərlə
yandırılırdı. 1988-ci ilin sentyabrında ermənilər Xocalıya və Kərkicahana hücum
etməyə başladılar. Qorxmaz kərkicahanlılar daş-kəsəklə hücuma keçən kütlənin
qarşısını igidliklə ala bildilər. Kərkicahan camaatı heç bir zaman düşməndən
qorxmayıb. 1991-ci ilin dekabr ayı kərkicahanlılar üçün ən ağır və həlledici ay
oldu. Dekabr ayının 2-dən ermənilər aramsız hücuma keçdilər. Silahsız və
sahibsiz qalan camaat 366-cı motoatıcı alayın hərbi texnikası qarşısında tab
gətirə bilmədi. Kərkicahan
camaatı işğala qədər 34 nəfər şəhid verdi. İşğal günündən sonra da
kərkicahanlılar düşmənlərə qarşı igidliklə döyüşdülər. Xocalıda erməni qəsbkarları tərəfindən hər iki
valideyni qətlə yetirilən 25 nəfər uşaqdan 5-i Xankəndindən Xocalıya köçən
sakinlərdəndir.Xankəndi və Kərkicahan sakinləri respublikanın 38-dən artıq şəhər və
rayonlarında doğma el-obalarımıza qayıdacağı günün ümidi və arzusu ilə
müvəqqəti məskunlaşıblar.Vətən müharibəsində Kərkicahanın gəncləri könüllü olaraq döyüşlərə
qatıldılar. Torpaqlarımızın azadlığı uğrunda igidliklə döyüşərək adlarını Şanlı
Zəfər tariximizə yazdılar. Xalqımızın qələbə ruhunu, döyüş əzmini artıran,
Qarabağa qayıdışı təmin edən Zəfər yolu Xankəndindən, Xocalıdan da keçəcək.
 Tədbirdə Xocalı rayon Xankəndi şəhər Natiq Şahmuradov adına 6 saylı
Kərkicahan qəsəbə tam orta məktəbin şagirdləri vətənpərvərlik ruhunda yazılmış şeirlər səsləndirdilər.Tədbirin
sonunda şəhidlərimizin xatirəsinə ehsan süfrəsi açıldı.